بعض الهدايا
بعض الانامل.. تصنع فنون تحفه
ترقص بها ريشه وترقص لها قلوب
وبعض الهدايا... نستلمها بوقفه
من كثر ماهي غاليه توقف شعوب
تسـلم يميـنه... والانامل وكفه
عـزالله انه راقي الـذوق عذوب
الشكر قاصر.. قوم يا شعر وفه
هات الحروف الماس لاتبني الطوب
انا اشهد انه يسحر الناس لطفه
وعذوبته لو تلمس الصخر بيذوب
رقة صدى صوت النغم قبل عزفه
براءة الاطفال سلوات مكـروب
يوسف حلاه ومريم اعطته عفه
طهارته من طهر موسى ويعقوب
واسع عيونه يشتكي حلو طرفه
وشموس خده مالها وقت وغروب
بيض الثنايا لول.. والجمر شفه
وحلو اللما كن العسل فيه مسكوب
عنق الضبا عنقه ومردوف كتفه
جيده زجاج يبين الوان مشروب
والصدر بستان استوت فيه ضفه
موسم ربيعه واسع الخير مرحوب
منه الضبا.. تاخذ رشاقه وخفه
يمشي وكنه لا مشى عود رعبوب
الطيب وش هو الطيب لاهب عرفه
انفاسه العذبه تجي عطر وطيوب
ناعـم طري شفاف لو تستشفه
تقول هــذا معجزة رب وتتوب
فيه يتلاقى الطين والنور صدفه
وجهٍ وسيم وقلب راقي وطيوب
زايد حلاه... وفوقها زاد عُرفه
ذكي مثقف مطلع شخص محبوب
كل العذاري مايساووووون نصفه
بينه وبين احلاهن شروق وغروب
اول.. والاول باقي الزين خلفه
مايلحقونه لا ولا في طرف ثوب
زينه خيالي واعجز الشعر وصفه
الحور ماتوصف على شعر مكتوب
حتى الذي قد طوع الشعر حرفه
معاند الشاعر عجز بات مغلوب
ماهـو ملاك.. ولكن النور لفه
مخلـوق مثله مثل ادم وايوب
انسان مثل الناس من اصل نطفه
بس ان ماله مثلنا نقص وعيوب
يا حظ منهو في حنانـه ترفـه
لا واهني اللـي يسميه محبـوب
بعض الهــــــــــــــدايا
العرض العادي
